top of page
  • Writer's pictureBahaa Awaad

اعترافات شرلوك هولمز الاخيرة


-1-

 انتصرت  على   كل  اعدائي   ..

ما  عدا  النساء   منهم  ..

النهاردة  و  انا  با اولع  البايب   .. و  اراقب  فجر   آخر   جديد   ..

بيعدي  عليا   من   غير   لحظة  من  نوم  .. با  افكر   ان  كان  ايه   المانع  .. مع  واحد  بس  من  اعدائي  ..

اني   و احنا  في   ذروة  العداوة   و  التخطيط   .. و  التخطيط  المضاد   ..

  لو  كنت  دعيته   لكاس  في  بار   من  بارات   ضواحي  لندن  ..

و  الكاس  سلم  لتاني   و تالت   .. لو  كنت  سألته   عن  علاقته  با  اهله   .. لو  كنت  حكيت  له   عن  اول  بنت   فتحت  لي   خزانة   الجسد   ..

ايه   فايدة   التورتة   لو   مش   نستمتع  بكريمتها   لآخر   رمق   ..

ح  احكي  له  ازاي   قلت   كده  لصديق  المراهقة  اللي  كنت  با  احكي  له   .. و   ازاي   ضحك   ..   و   بص   لي   بصة   ..  زي   ما   يكون   جندي   مغرم  بالحرب   بيبص   لنابليون   .. 

ايه  فايدة  العداوة   و  النصر   ..

لما  بتقرب  الرحلة   من  النهاية   ..  و  يتساوى   في  المذاق  ..  كل   طعم   ..  

و   كل   لون  .

ايه  بجد   يستاهل  اننا  نعاديه   ؟

و   مين   ممكن   بجد   يتأهل   لشرف  استحقاق   العداء   ؟

اسحب  بعمق   من   دخان   البايب   .. و  انتظر    النهاية   .  

- 2 -  

ما  اطول  الرحلة   ..  لو   الذهن   يفضل  مسجون   في   الاسباب   و النتايج  ..

و  يعادي  الروح   اللي  مستنية   انها  تحلق   و  تطير   و   ابدا   ما  تلمسش   الارض   تاني    ..

دورت   على  الحقايق   ..  كأن   الحياة   مش  كفاية  لوحدها  كحقيقة   ..

اننا  نلمسها  ..

و نعتبر   ملمسها   هو  التحدي   الحقيقي   الاكبر   ..

نكتفي   بلمسها   كغاية   نهائية   لوجودنا   ..

سجنت   الروح   في   غابة   الذهن   ..  و بنيت   حواليها   اسوار   النظر   و  السمع   .. 

  الحاسة   اللي   ما  اعتنيتش  بتقويتها    هي   اللمس   .. 

لو   ترجع   خطواتي   لبداية   الرحلة    ..

كنت  قفلت   عيني   و  وداني    ..  و   احتفلت   بس   بلمسة   كل    شيئ    ..

كل   وردة    ..    و   كل   حائط      ..    و   كل    جرح   .

- 3 -

عزيزي   واتسون  ..

حاصرتنا  الحقايق   ..

استسلمنا  بالكامل    ..

  هزمتنا  الاسباب  و الشواهد  ..

و  فقدت  ارواحنا  احتفالها  بالمستحيل  .. بكل  اللي   ممكن  كلمة   مستحيل  ..  

تطلقها   من  شلالات    و  براكين       و  عواصف   ..

بكل  اللي  قادر   المستحيل   انه   يحرره   في  اشواقنا   ..

من  غير   مستحيل   ..

مش  ح  يفضل  في  قعر    الكأس   غير    القواعد   و  القوانين   .. 

غير   الملل   ...

خلينا   نعترف  بالحقيقة   واتسون   صديقي   ..

الجريمة   الحقيقية    في  حياتنا  اللي   تستحق   العقاب   ..

هي    استسلامنا   لكل   هذا  الملل   ..

لو   تيجي   الفرصة   لتبادل  المواقع   ..

بيني   و بين   كل   اللي   اكتشفتهم   من   مجرمين   .. بكل  البراعة   اللي   اكتسبتها  عبر  السنين  في  مراقبة  الملل  و فهم   قوانينه   ..

  مش   ح  اتردد   لحظة     في   قبول  المبادلة   ..

يمكن   دي  تكون  التويست   الاعظم  في  كل   مغامراتي   ..

ايه   فايدة   التورتة   لو   مش   نستمتع  بكريمتها   ؟

لو   حتى   كان  ح  ينتهي  بي  المشوار   لقاع  زنزانة   ضيقة  ..

ايه   يهم  او  يفرق   ..

لو   لمسنا  المستحيل   ببريقه   .. 

و   اتمدد   في   كل   زوايا   الروح  .


22 views0 comments

Recent Posts

See All

شتا

Commentaires

Noté 0 étoile sur 5.
Pas encore de note

Ajouter une note
Post: Blog2_Post
bottom of page