تيتانك

‏

1

بيتقال ان الفرقة فضلت تعزف و السفينة بتبلعها المية ببطء ..

ايه اللي خلا العازفين يستمروا في العزف رغم قبضة الموت اللي بتحاصر و بتضغط ؟

الرغبة في الاحساس ان كل شيئ عادي و طبيعي رغم حصار العدم و النهاية ؟

محاولة القلب الامساك بشيئ مألوف و محبوب بعد ما ضاع و انهار كل شيئ ؟

و كأننا كلنا النهاردة عازفين بس في تيتانك اكبر ..

في بحر اعمق و اخطر ..

كلنا بنبتسم و نضحك .. و نلعب و نتسوق و نراسل اصحابنا بالتيكست على الواتس آب ..

و كأن كل شيئ عادي و طبيعي ..

و كأن العدم و النهاية دي كلمات في الحواديت مالهاش في الحياة الحقيقية اي معنى ..

و كأن الحياة على الكوكب ده ..

فاضل لها لسه دهور و قرون و الفيات .

2

اكثر حاجة تذكرها مريح ليا في كل اللي مرتبط بميلادي هو حقيقة اني اتولدت على البحر ..

فيه تذكار بيسيبه البحر في عيون اللي بيتولدوا على شواطئه ..

و تجبرهم الدنيا على الرحيل ..

بعيد .. بعيد عنه ..

تذكار غويط ..

اثر على الجبين اعمق من اللي بترسمه ريشة القدر ..

ده اللي بيسيبه البحر جوانا و على وشوشنا ..

احنا ابنائه اللي خطفتنا الايام من بين ايديه ..

النهاردة بيعلا البحر با امواجه و يستردنا ..

بيبلع الارض و الوجود ..

جميل زي ما انتظرناه طول اعمارنا ..

بوضوح و بجرءة .. و من غير اخذ الاذن من حد ..

بياخدنا في حضنه احنا المولودين على شواطئه ..

مرة اخيرة .. و للابد .

3

جميلة كانت اسكندرية في الشتا ..

كأنها بنت مثيرة بيطير هوا البحر شعرها برعونة ..

هل فيه طريقة نقدر نوصل بيها لمخلوقات تانية جديدة ح تسكن الارض بعدنا ..

ان كان فيه مكان اسمه كامب شيزار ..

و كان فيه فصل اسمه الشتا .. بيسبب شعور صعب اسمه البرد ..

كان ممكن في المكان ده فى الفصل ده صباحا ..

تفطر عيش فينو سخن مع القشطة ..

و تشرب كوباية لبن ساخن دايب فيه العسل الابيض ..

و تبتسم لك بنت جميلة و انتا بتحكي لها على ذكرياتك و البحر قدامكوا ممتد ..

و ينتهي ساعتها و يتبخر و يتلاشى ..

اي معنى في الوجود للبرد .

أو للعطش .

4

كان لمين اللحن اللي بتعزفه الفرقة و المحيط بيبلع السفينة ؟

لشوبرت و الا موتسارت و الا بيتهوفن ..

تفصيلة تانية غايبة و غامضة في زوايا التاريخ ..

يا ترى مهم اسم الفنان اللي ودع مع انغامه الناس الدنيا ؟

يا ترى مهم الفن اصلا قدام قسوة حقيقة النهاية ؟

و ايه معنى اعمارنا اللي رميناها على اعتاب الفن ..

و اسم الفنان هو اول حقيقة بتتنسي ..

اول ما يعلا الموج .

5

ح تيجي اوقات اجمل ..

ح نعبر بالاشرعة لبحور اوسع ..

و حتى لو كان اجمل يوم في حياتنا خلاص بقا ورا ضهرنا ..

حتى لو عبر شراعنا اجمل بحر ممكن تشوفه عنينا ..

مش بعيد يجي يوم تلاعبنا فيه الذاكرة من تاني ..

و تهدينا من غير توقع و لا انتظار ..

اجمل .. اجمل كنوزها .